كيفاش نخطط للموسم الدراسي في الجامعة؟

اول عام ف لافاك ؛

 كيفاش نخطط للموسم الدراسي من لول ؟
 كيفاش نتعامل مع الدروس ؟
 كيفاش نراجع للامتحانات؟
 كيفاش داير السيستيم دلافاك ؟
 صيفط لصاحبك عندو أول عام فلافاك ومتنساش الاغلبية ديالكم ما عارفش كيفاش غادا تكون لقراية في لافاك، كيفاش غادي تقرا الدروس، كيفاش غادي تراجع وتحفظ وتنظم وقتك.....،   _ فالبلاصة ديال الدروس والمقررات كاين المطبوع أومايسمى بالبوليكوبي، البوليكوب تيصاوبو البروف وتيحطو فالمكتبة فيه داكشي ليغتقرا فالموديل كامل، خاصك نتا تشريه وتقراه فالدار.   _ ملي غانمشي لافاك اش غاندي معايا، كتدي معاك دفتر فاش تكتب النقط المهمة من داكشي لي تيقول الاستاذ، و ملي تمشي للدار جمع هاد النقط وقارنها مع داكشي لي في البوليكوب و قرا داكشي مزيان، اي حاجة درتيها خاصك تراجعها، باش ما يتجمعش عليك داكشي في اخر السوميستر . _ البروف ما كيتسوقش ليك حيتاش عندو شي 1000 مخلوق بحالك فلونفي، يعني خاصك نتا تسوق لراسك، و تزير راسك الى بغيتي تقرا. _ البروف ما غادي يقوليك لا حفظ، لا الامتحان السيمانة الجايا، كلشي عليك نتا، قري راسك براسك، اي حاجة درتيها سير للمكتبة أو الانترنيت بحث عليها و حاول تفهمها و دير دفتر قيد فيه داكشي كامل، عرفتي علاش؟ حيث نتا دابا سميك طالب باحث ماشي تلميذ، و اهم حاجة، الى كتبتي اي درس خاصك تسالي معاه داك النهار تعشى بيه ان صح التعبير يعني غاتراجعو مزيان، راه في آخر السوميستر تيكون عندك غير عشر أيام باش تراجع فيها، و إيلا راجعتي فيها شي حاجة ها وجهي، راه الشريف كل موديل بحال المقرر ديال الاجتماعيات خاصو يتحفظ كامل. اييه ماتحكرش داكشي. _ فلحفاظة دير ملخصات و خطاطات، و حفظ بالطريقة ديالك الخاصة لي كترتاح فيها حاول تجمع ما بين الحفظ و الفهم. _ ديك اللعيبة ديال حتى يقربو الامتحانات عاد نراجه داكشي ما كيناش،ويااك ديرها. لي درتيها حفظها فالبلاصة،إلى خليتي داكشي حتى يتجمع عليك وبغيتي تفهمو ف 10 أيام. من نيتك تفهم الموديل كامل فعشر ايام. _ الوقت ديالك حاول تنظمو، كل واحد كيف عايش حياتو اذن حاول تنظم الحياة ديالك وتعطي كل دي حق حقه. ماشي تزي راسك بالقراية. من هادشي كامل ستمتع بالحياة ديالك ودير داكشي لي بغيتي استغل الشباب ديالك ولكن متنساش المستقبل ديالك.  _ حاول ما امكن تغلب على الكسل والخمول إلى كانت عندك شي حاجة بغيتي توصلها نوض وتقاتل وضرب تمارة عليها اكيد فاللخر غادي توصل. __ هادشي لي قلت كينطبق على لولاد و لبنات، الى عندك شي فكرة اخرى و كترتاح ليها طبقها و نظم وقت و قرايتك و السيستام ديال حياتك بداكشي لي كتراتح فيه و كيبان ليك معقول و يقدر يوصلك لداكشي لي باغي، ركز على مصلحتك ومستقبلك،و بعد على اي حاجة تقدر تخرج عليك.